Ministry of Urban Development and Sacred Area Development

Tamil (Sri Lanka)English (United Kingdom)

ප්‍රධාන මෙනුව

ඔබ මෙතනයි : මුල් පිටුව භෞතික සැළසුම

භෞතික සැලසුම්

දියුණුවට පත් වී තිබෙන සෑම රටක්ම ජාතික භෞතික සැලසුම් ප්‍රතිපත්තියක් හා සැලැස්මක් මත කටයුතු කරමින් සංවර්ධන කටයුතු මෙහෙයවනු ලබයි.

ශ්‍රී ලංකාව සඳහා ජාතික භෞතික සැලැසුම් ප්‍රතිපත්තියක
හා සැලසුමක අවශ්‍යතාව හඳුනා ගැනුනේ 1977 දී පමණ වේ.මෙම අවශ්‍යතාව යථාර්තයක් බවට පත්කිරිමේ වගකීම දැරීම, නාගරික සංවර්ධන හා පුජා භූමි සංවර්ධන අමාත්‍යාංශය යටතේ පාලනය වන ජාතික භෞතික සැලසුම් දෙපාර්තමේන්තුවට පැවරී ඇත. ජාතික භෞතික සැලසුම් දෙපාර්තමේන්තුව, 1946 අංක 13 දරණ නගර හා ග්‍රාම නිර්මාණ ආඥා පනතේ 2000 අංක 49 දරණ සංශෝධන පනත මගින් ස්ථාපිත කරන ලදී.

අවශ්‍යයෙන්ම රැකගතයුතු පරිසරය රැක ගැනිමත්, පරිසරයට සිදුවන හානි අවම කෙරෙන ජනාවාස රටාවක් සංවර්ධනය කිරීමත් ජාතික භෞතික සැලසුමේ ප්‍රධාන අරමුණුය. දෙපාර්තමේන්තුවේ ප්‍රධාන කාර්ය භාරයක් වන ජාතික භෞතික සැලසුම් ප්‍රතිපත්තිය සහ ජාතික භෞතික සැලසුම සකස් කරන ලදුව 2007 ජුලි මස 30 වන දින අතිගරු ජනාධිපතිතුමා වෙත පිළිගන්වන ලදී.

ස්වභාවික විපත් වලින් තොර ජනාවාස රටාවක්ද, සංවර්ධනය සඳහා අවශ්‍ය යටිතල පහසුකම් පද්ධති සහිත සැලසුම්ගත නාගරික ප්‍රදේශ ජාලයක් ද, නාගරික හා ග්‍රමීය අංශ නිසි ලෙස සම්බන්ධීකරණය වන සේවාවන් සපයන කුඩා නගර පද්ධතියක් ද ජාතික භෞතික සැලසුමට අන්තර්ගත වේ.

පාරිසරික අධිසංවේදී ප්‍රදේශ ආරක්ෂා කිරීමටත්, වනාන්තර, වනජීවි හා පුරාවිද්‍යාත්මක ප්‍රදේශ ආරක්ෂා කිරීමටත් ප්‍රතිපත්ති සකස් කර තිබෙන අතර, විවිධ කෘෂිකාර්මික කටයුතු සඳහා යෝග්‍ය ප්‍රදේශ ආරක්ෂා කර කෘෂි නිෂ්පාදනය ඉහළ නැංවීමත් මෙමගින් යෝජනා වී ඇත. කෘෂිකාර්මික හා අනෙකුත් සම්පත් ආශ්‍රිත කාර්මික සංවර්ධනයට අවශ්‍ය පහසුකම් ලබා දීමට ක්‍රමවේදයක් ද හඳුන්වා දී ඇත. ජාතික භෞතික ව්‍යුහ සැලස්ම; ප්‍රධාන නාගරික කලාප, ප්‍රධාන මහා මාර්ග, ප්‍රධාන දුම්රිය මාර්ග, ප්‍රධාන වාරයන්, ප්‍රධාන ධීවර වරායන්(යෝජිත), ප්‍රධාන බලශක්ති බලාගාර(යෝජිත), ප්‍රධාන ‍ගුවන්තොටුපල යන මුලික භෞතික අංග වලින් සමන්විතය.

මෙම සැලැස්මේ මුලිකාංග තුලින් ජනකොටස් අතර සම්බන්ධය, භූමි පරිභෝජනය,ප්‍රවාහනය, ආර්ථික ක්‍රියාකාරකම් සහ කලාපීය, සමාජීය සහ ආර්ථික අසමතුලිතතාවයන් අවම වේ යැයි බ‍ලාපොරොත්තු වේ.

ජාතික භෞතික සැලසුම් දෙපාර්තමේන්තුවෙහි තවත් වැදගත් කාර්ය භාරයක් වනුයේ පළාත් සඳහා කලාපිය සැලසුම් සකස් කිරීමයි.
ජාතික භෞතික සැලසුම හා ප්‍රතිපත්තිය මාර්ගෝපදේශ කර ගනිමින් දෙපාර්තමේන්තුව මගින් කලාපීය භෞතික සැලසුම් සකසනු ලැබේ.

මේ වනවිට නැගෙනහිර සහ සබරගමු පළාත් සඳහා කලාපීය භෞතික සැලසුම් සකස් කර ඇත. වයඹ, දකුණ, උතුරු මැද, බස්නාහිර, ඌව, උතුරු සහ මධ්‍යම පළාත් සඳහා සැලසුම් සකස් කරමින් පවතී.

මෙම ප්‍රතිපත්තිය හා සැලස්ම වර්ෂ 2030 දක්වා භෞතික සංවර්ධනය මෙහෙයවීමට භාවිතා කළ හැකිය.

භෞතික සැලසුම් පිළිබඳ වැඩි විස්තර සඳහා>>